Revalidashon Kardiáko, Pulmonar i Muskular

Revalidatiecentrum Curaçao ta enfoká riba rekuperashon i mehorashon di e funshonnan kardiovaskular, respiratorio i muskuloskelétiko di e pashèntnan. Nos ta logra esaki dor di ofresé programanan di revalidashon kardiáko, pulmonar i muskular. Den e programanan akí, profeshonalnan di kuido spesialisá ta traha huntu pa mehorá e kondishon físiko, funshon respiratorio i kalidat di bida di e pashèntnan.

Kiko ta revalidashon kardiáko?

Revalidashon kardiáko ta yuda pashèntnan ku un kondishon di kurason pa rekuperá mas lihé i bolbe na un bida diario mas normal posibel. E programa ta enfoká riba mehorashon di e kondishon físiko, mental i sosial pa asina e por funshoná bèk den komunidat. E programa ta sosodé den kolaborashon ku bo kardiólogo i un tim multidisiplinario.

E programa di revalidashon kardiáko ta guia bo pa un estilo di bida mas salú ku yudansa di:

  • Entrenamentu físiko bou di supervishon
  • Edukashon
  • Guia personal si ta nesesario

Ken ta bin na konsiderashon pa revalidashon kardiáko? 

Personanan ku a pasa den un di e siguiente kondishonnan di kurason ta bin na konsiderashon pa e programa di revalidashon kardiáko:

  • Infarto di kurason (Myocardial infarction)
  • Operashon di kurason habrí (CABG) òf operashon di klèp di kurason
  • Kateter di kurason ku angioplastia òf kolokashon di stènt
  • Insufisiensia kardiáko (Fayo di kurason)
  • Implantashon di un pacemaker òf ICD
  • Defekto di kurason kongénito
  • Rísiko haltu pa malesa kardiovaskular

Kon e programa ta hinká den otro? 

E programa di revalidashon kardiáko ta dura masoménos 6 pa 10 siman i ta konsistí di:

  • Entrevista di intake i evaluashon inisial
  • Entrenamentu físiko bou di supervishon (dos biaha pa siman)
  • Seshonnan di informashon
  • Evaluashon final

Kiko ta e benefisionan pa bo?

  • Mas konosementu di bo kondishon
  • Un estilo di bida mas salú
  • Kondishon físiko mihó
  • Mihó bista riba faktornan di riesgo
  • Mas konfiansa den bo mes
  • Por bolbe hasi aktividatnan diario bèk

Partisipashon 

Partisipashon den e programa di revalidashon kardiáko ta posibel via un referensia di bo kardiólogo.

Revalidashon Pulmonar 

Banda di revalidashon kardiáko, Revalidatiecentrum Curaçao ta ofresé tambe programanan pa revalidashon pulmonar i muskular. Revalidashon pulmonar ta parti di e plan di tratamentu pa pashèntnan ku kondishonnan króniko di pulmon. Ta aserká i implementá e programa akí tá for di un perspektiva holístiko. Un tim multidisiplinario ta traha huntu pa mehorá e kondishon físiko, funshon respiratorio i kalidat di bida di e pashènt.

Revalidashon Muskular

Revalidatiecentrum Curaçao ta ofresé tambe un programa di revalidashon dirigí riba pashèntnan ku malesa di múskulo. Na e Sentro di Revalidashon, regularmente nos ta trata pashèntnan ku síndrome di Guillain-Barré i tambe ALS. Pa medio di terapia dirigí, ehersisio i edukashon, nos ta brinda sosten pa mehorá nan kondishon físiko i kalidat di bida.

Kontakto

Pa mas informashon, por fabor tuma kontakto ku nos via: 

Salsbachweg 20, Santa Maria
+5999 524-2078
info@sgrgroep.org